متابعات- الزاوية نت- كتب وزير الصحة السوداني البروفسيور هيثم محمد إبراهيم تحت عنوان “حصة مجانا من ديلاي” قائلا: كما تعودنا في مسيرنا من البورت إلى كسلا ننزل قهوة ديلاي في منتصف الطريق، نصلي فيها ونشرب القهوة (ومارب أخرى) وكمان نأخذ خشم خشمين مع عمك حسب الله.
مرة قال لي: تعرف يا السيد الوزير نحن المواطنين ديل الواحد داير ليه بس بطاقة محل ما يمشي يلقي علاجو وتعالجو) درس مجاني عن دورنا بي نضارة المواطن البسيط، مش ياها التغطية الصحية.
نحن نقعد ونقوم… نلت ونعجن… نخطط ونستترج (من استراتيجية) وفي النهاية نصل للخلاصة الوصل ليها عمنا حسب الله في قعدة قهوة ومن غير ظيتا وظمبريتا وبعبارات بسيطة دون تعقيد وتقعيد وأنقلزة.
رغم اننا نحتفل هنا وهناك بجهاز حديث او افتتاح مستشفى او مركز تشخيصي متطور الا انه ليحزنني ان أرى مريضا “عاملين ليه كشف ما عندو حق العملية” واخاف ان يأخذه المرض ونحن عنه غافلون.
دي القصة من الاخر، فتح المستشفيات وتشغيلا خطوة وفرة الحبة والحقنة والدواء خطوة برضو كويسة، لكن الخطوة المهمة قالا عم حسب الله، دي روشتة المواطن ما في شك لو حققناها لكان خيرا لنا وأشد تثبيتا.. ده الحل وزي ما قالوا الحل في الـ(تامين)، إن قلنا خير لا بدورلو سيف لا درقة وان (طنشنا) يروح شمار في مرقة.
