كتب المنشق عن الدعم السريع إبراهيم بقال تحت عنوان “كتمة وكمين الإذاعة” قائلا: اللواء ادم اب شنب كان مسئولاً عن أمدرمان وكنا من وقت لآخر نزوره في مقر إقامته في بيت الامام الصادق المهدي في أمدرمان الإذاعة حيث هناك مقر العمليات والسيطرة للدعم السريع وكانت العمليات كاتمة شديد جداً وهناك تقدم كبير من قوات الجيش والقوات المساندة.
في الزيارة القبل الأخيرة للإذاعة وقعنا في كمين بالقرب من صينية التجاني الماحي فجأة ظهر لنا قوات من الجيش في تقاطع شارع الاربعين مع التجاني الماحي وعاملين ترتوار ودشم أول ودشم ثاني وعبرنا بقدرة قادر وفي لفة صينية حوش الخليفة كان هناك قناص يضرب من سوق أمدرمان.
تركنا العربة في الدشم الاول وعبرنا القناص زحفاً بالاقدام إلى ان وصلنا الاذاعة وقلنا للواء ادم اب شنب بعد خلصنا موضوعنا معاه “الله يعلم نقدر نرجع بي نفس طريقنا الجينا بيها لانو برة كاتمة بالجد والله وما نقدر نرجع بي نفس الشارع دا تاني” ومن شدة الهلع والدانات دي تقع في الدقيقة عشرة دانة ومسيرات.
المهم قعدنا 3 أيام ولا كم يوم ما عارف لا ادري كم لبثنا يوماً او بعد يوم لان لا شمس لا عارفين الدنيا نهار ولا ليل ، تحت البدروم في بيت الامام الصادق وفي اليوم الاخير جاء الفاتح قرشي عبر البحر بالمركب جاب امداد وتموين.
اللواء اب شنب قال لينا عندكم حل واحد يا اما ترجعوا مع الفاتح قرشي بالمركب دا بالبحر وانتم وحظكم لو وقعتوا جوة البحر ياكلكم السمك يا اما تخاطروا وترجعوا بي نفس الشارع الجيتو بيها، والوقت داك الشارع داك قفل نهائي وكتم كتمة جد والجيش عبر والتحم قوات المهندسين بحيش كرري ، قلنا له يا سعادتك والله بالبحر دا صعب وبي نفس الشارع داك اصعب مع الزعل قال لينا طيب ابقي ليكم هليكوبتر يعني ولا اعمل ليكم شنو؟ ترجعوا بس لو كتلوكم يكتلوكم انتم ما احسن من الناس الماتوا
المهم اتوكلنا بالبحر واتشهودنا وركبنا المركب ، والمركب ماشي بينا في نص البحر فقد السيطرة وماشي وراجع بينا اتجاه المهندسين ماشي يسلمنا للجيش ونحن نقرأ في الايات ما خلينا آية حافظنها ما قريناها في النهاية ختمنا بي “طلع البدر علينا”
الفاتح قرشي دخل في كومة واغماء من شدة الخوف والخلعة بال لينا في المركب ويلا ويمين رشيناه موية ومكمدات فاق من الاغماء وبالجلالة قدرنا سيطرنا علي المركب وغيرنا المسار ، طلعنا اتجاه كبري الحلفايا وطلعنا قريب للمزارع ودخلنا بحري ومنها شمبات وكافوري لغاية وصلنا القنطرة وحلة كوكو وكبري المنشية ومنها للخرطوم وبكبري جبل اولياء وصلنا امدرمان الصالحة.
وبعد أيام تم تحرير الإذاعة وكل الناس كانوا مفتكرني في الإذاعة في الوقت داك وحسبوني في اعداد الموتى أو الأسرى لكن تخارجت قبل تحريرها بأيام قلائل
