متابعات- الزاوية نت
قدم المستشار القانوني المتخصص في تحليل و تسوية النزاعات حسن شقاق، 8 نصائح قانونية للسودانيين الموجودين خارج السودان بسبب الحرب أبرزهم في دولة مصر والإمارات.
وكتب هذه النصائح في حسابه على منصة إكس رصدها (الزاوية نت) وجاءات كالآتي:-
1- إذا موجود في السودان ما تشتري او تبيع عقار نهائي حالياً حتى لو بسعر رخيص لأن سلطات الأراضي حاليا ما شغالة بالتالي ما حتقدر تستخرج شهادة بحث بغرض التأكد بتاريخ جديد عشان تتأكد من بيانات العقار وحالته القانونية.
2- إذا موجود في أي بلد احتفظ بأوراقك الثبوتية في مكان آمن و لما تطلع من بيتك شيل معاك بطاقة او جواز لأن الظروف ما معروفة.
3- الناس الفي مصر ما تخلوا أطفالكم يلعبوا تحت العمارة او في الشارع بدون مراقبة (جرائم الخطف والاتجار بالبشر نشطة جدا في كل العالم) لأن ممكن ما تلقوهم تاني
4 -ما تعمل مظاهرات او احتجاجات (كمثال الاحتجاج أمام مباني سفارات الدول او مكاتب المنظمات و المصالح الحكومية) لأن في دول كتيرة الاحتجاج بيحتاج تصريح و إلا يعتبر مخالف للقانون وممكن يتسبب في ترحيلك فورا أو سجنك مع احتمال الغرامة.
5- إذا عايز تأجر عقار أقرأ عقد الايجار كويس لان كل بلد عندها قوانين و أعراف للايجار تختلف عن القوانين السودانية (مثال في مصر ممكن تلقى عقد الايجار في المكتبات عادي) لكن لازم تسأل شخص موثوق عن عملية الايجار كيف تتم لان عندهم بتدفع ايجار شهر مقدم + تأمين (ايجار شهر مسترد)+ عمولة والعمولة يمكن التفاوض فيها.
6- إذا عايز تعمل بزنس (في القاهرة أو الإمارات) لازم تاخد فكرة عن القوانين واللوائح الحكومية وتلتزم بيها (الرخصة التجارية، الضرائب، الصحة، السجل التجاري..الخ) حتى لوكان محل صغير عشان ماتفقد راس مالك ويقفلوا ليك المحل (وغالبا تدفع غرامة).
7- إذا محتاج أي معلومة عن الاجراءات القانونية و الخطوات المطلوبة ممكن تدخل النت و بالنسبة للناس في القاهرة ممكن تمشي تستفسر عن المطلوبات في جهاز تابع للدولة اسمه (الشهر العقاري) لأن معظم اجراءاتهم ومعاملاتهم المدنية يتم تسجيلها في الشهر العقاري.
8- إذا كنت في القاهرة ما تشيل معاك عملة حرة كتيرة في جيبك لأن عندهم القوانين في التعامل بالنقد الاجنبي اصبحت مشددة جدا الايام دي والاشتباه فيك ممكن يؤدي لسجنك او تعرضك لمشاكل ما تخلص بسهولة في وقت انت محتاج فيه لكل لحظة في حياتك عشان خاطر اسرتك.
واسعة جدا موضوع خلى بالكوا من عيالكوا لو هم فى الشارع لأن خطف الأطفال وتجارة الأعضاء منتشرة . متأكد إنك بتتكلم عن القاهرة ؟
أعتقد بإنك عمرك مانزلت للقاهرة .