كتب عوض غفران- “خليك مفتح وواقعة ليك” إذا أردت شراء منظومة طاقة شمسية، بالأقساط أو كاش، لا تشتري من شركة “قشّاشية” أو أي شخص “عنقالي”، أو محل غير معتمد “ساي” لأنك بهذه الطريقة ممكن تدفع قروشك لشخص ما اداك خدمة، وتفقد المنظومة الاشتريتها في أقل من سنة، وتلقى نفسك لا عندك ضمان ولا زول تتحاسب معاه.
عشان تحافظ على مالك وحقك، لازم تعمل الآتي:
- ما تشتري أي منظومة من غير كتيّب مواصفات فنية واضح، يحدد نوع وموديل الألواح والبطاريات والعاكس وقدراتها.
- إذا اشتريت عن طريق البنك، لازم البنك يضمن ليك حقك في المنظومة، بنفس الجدية البياخد بيها ضمانات السداد منك.
- خُد كرت الضمان من الشركة المصنّعة أو الوكيل المعتمد، وخلي بياناته جزء من عقد التقسيط.
- يجب ان تكون الجهة التي باعت لك المنظومة مسؤولة عن تركيبها، أو تعيّن فني معتمد، عشان أي خطأ في التركيب أو التشغيل تكون عندك جهة واضحة تتحمل مسؤوليته يعني انت تدفع وتلقى بيتك منور.
لازم تركز الضمان ما كرت تستلمه ترميه في الدرج، لازم يكون ضمان يحدد المدة، وكل مكوّن في المنظومة شكله ووصفه، وشروط الصيانة والاستبدال، والأعطال التي يغطيها، والجهة المسؤولة عن تنفيذ الضمان، وكيفية الوصول إليها.
خلك مفتح، مسؤولية التركيب والصيانة لازم تكون واضحة ومكتوبة في العقد، ما مجرد وعود شفهية، ما تدوا الناس قروش ساي، وما تضيعوا حقوقكم ساي.
والأهم: لازم السوق يتنظف من الناس التي تستورد نوعيات رديئة أبو قرشين، وتبيعها للمواطنين بمليارات، مستغلة حاجتهم للطاقة وضعف معرفتهم بالمواصفات الفنية.
